吳柳澤老師指導學生演出閩南語劇「TAKAU」，於學生朝會時向全校學生介紹高雄這個地名的由來，讓學生了解高雄地名的歷史沿革，饒富趣味及意義。

「TAKAU」「打狗」「Takao」「高雄」

2023.05

S校長，各位主任，老師，全校ê小朋友逐家好。

咱高雄此個（這个）地名，古早是號做打狗。因為台語課本有寫，相信五六年ê學生lóng知影。

是講是按怎咱tsit-má無koh使用打狗，是kā叫做高雄--leh？

今仔日ê母語日，阮想欲向（ǹg）逐家紹介咱所住（蹛）ê高雄，i此個地名演變ê經過。

Tī此個出業ê時節，mā向望紲落來ê時間，thang hōo六年ê先輩（siăn-pái）成做一個紀念。

（第一幕）

A1我kā你請教一下好無？是按怎台語課本寫講，咱高雄是對打狗變來--ê？敢講古早ê高雄人lóng teh 摃狗仔！？（吠）

B1這我前一陣仔bat查網路過，拄好thang回答。這參（tsham）日本時代誠（tsiânn）有關係，咱岡山國校，mā是日本時代起--ê哦！而且koh 19世紀就起好勢--ah neh！

C1日本時代是按怎欲kā打狗改做高雄--leh？是因為欲保護狗仔是無？

B2這lóng是誤會lah，kap狗仔無關無係。打狗，是平埔族語，讀做「TAKAU」ê音。台灣人自按呢（tsuănn）聽做「Tá-káu」，漢字寫起來拄好變做摃狗仔彼個怪怪ê意思。

A2是按呢哦！若按呢講起來，打狗是因為拄好，才會寫做摃狗仔此兩個漢字。按呢「TAKAU」原底是啥物意思--leh？

B3平埔族語「TAKAU」ê意思是「竹林」，因為tsit-má高雄港hit tah古早lóng是竹仔樹。

（第二幕）

C2原來打狗ê意思是竹林，m̄是摃狗仔，總算了解--ah！若按呢，是按怎尾手koh變做高雄--leh？

B4日本mā是使用漢字ê國家，in看打狗此兩字mā知影是摃狗仔ê意思。日本tī台灣ê時，看著高雄愈（jú）來愈發展，suah 用一個摃狗仔ê地名，感覺誠無妥當，就kā改。

A3是按怎會改做高雄--leh？Thài無改做別項--leh？

B5這是照日語ê發音改--ê。「TAKAU」聽起來親像日語ê「Takao（たかお）」，「Takao」寫做日本ê漢字就是高雄。

C3原來是按呢！莫怪我按怎tàu，都（to）無法度kā打狗kap高雄想做有關係。原來in ê由來lóng是平埔族語「TAKAU」ê音，是講一個寫做台語ê漢字「打狗」，一個寫做日語ê漢字「高雄」。

（第三幕）

B6順（sīn）紲koh報一項hōo恁知。咱高雄tī彼陣改地名ê時，險險就予人（hông）改做高尾哦！

A4高尾！？有影無影？懸懸ê尾仔彼兩字敢是？

B7規欉好好—無剉！因為高雄kap高尾，tī日語lóng是讀做「Takao」。

C4真好佳哉！若彼當陣（hiàng-tsūn）改做懸懸ê尾仔彼兩字，我tsit-má kā人講家己住tī高尾市…感覺就無hiah光彩…高雄加tsiok好聽--ê！

A5我mā按呢感覺，佳哉打狗改做高雄m̄是高尾。高雄hōo人感覺飛懸懸，是不止仔有氣勢ê地名neh！

D咱來複習一下。咱高雄，上起頭是平埔族語，讀做親像「TAKAU」ê音，意思是「竹林」。

台灣人聽著此個音，就kā寫做摃狗仔ê意思ê漢字「打狗」。　

日本人來，感覺「打狗」此兩個漢字siunn過粗俗，就照日語ê發音「Takao」改做新漢字「高雄」。這是咱岡山國校1898年起好了後22冬，也就是1920年改做高雄--ê。對咱現代來講，此兩項lóng已經是百外冬前ê代誌--ah。

戰後，咱猶原使用日本人留落來ê漢字，m̄-koh kā讀做台語ê「Ko-hiông」，抑是中文ê「ㄍㄠㄒㄩㄥˊ」，koh有英語ê「Kaohsiung」。

阮是「5-3」ê代表，多謝逐家。