教師參加本土語研習

鼓勵學生以母語創作

高雄市楠仔坑國小去參加 公視台語台「旺梨西瓜仙拚仙」ê錄影心情筆記

指導老師 洪憶心Âng Ek-sim

 葉。齊Ia̍p 。-tsê

這遍我去參加「旺梨西瓜仙拚仙」是足緊張--ê，因為老師派我kah小妹表演劍道。
雖然緊張put-jī-kò有小妹陪伴khah袂hiah驚。
主持人有問我是按怎會學劍道，是阮阿爸有hōo阮看過「劍道小精靈」ê電影，
koh有阿爸阿母ê鼓勵，所以阮兄妹仔攏做伙學劍道。
主持人kā我訪問足tsē neh，m̄-koh攏鉸掉--ah，無彩！
這擺去公視ê表演hōo我ke足有自信--ê，阮這隊mā有tio̍h獎金kah獎盃!

 李。毅Lí 。-gē

彼工起錄影我足緊張--ê，驚會thut-tshuê。
M̄-koh去攝影棚了後，頭拄仔ê緊張完全消失去--ah，
換來ê新鮮感摻一點點仔ê興奮，原來這tō是 演員拍片ê所在。
等到輪tio̍h阮錄影ê時，我koh開始緊張--ah，足kia̋nn--ah會因為我害著阮這隊輸去。
好佳哉!阮這隊有贏tio̍h比賽真正是祖公仔有保庇。

彼一暝，我提tio̍h比賽得tio̍h ê獎金，抱tio̍h歡喜ê心情坐高鐵轉來高雄，
到厝看tio̍h阿爸阿母我一直kah in分享講錄影有guā好sńg，外趣味。

上好sńg ê是tia̍k算盤，beh去提物件ê時感覺煩惱攏放袂記--ah，
心情足輕鬆，算錢ê時陣suah顛倒緊張kah連話攏講袂清楚，
尾仔，贏--ah! 心情hām我提ê尪仔仝款足suí!

彼一暗，我mā是歡喜kah睏袂去，真希望koh有後擺ê機會koh來去電視台錄影!

蘇。安 Soo 。-an

這擺去電視台錄影我足歡喜，因為這是我第一擺上電視，嘛是第一擺去到電視台。
遐，冷氣有夠冷，好佳哉是熱--人所以袂感覺寒顛倒我感覺真爽快。
我去遐學tio̍h 足這智識，像總統府ê各種智識，
原來壁邊ê孔m̄-sī tàn糞埽--ê,阮攏ioh m̄-tio̍h，原來看燈tō知影總統有tī 「厝」無！
雖然有ê是ioh--ê，m̄-koh我感覺足讚！

吳。紜 Ngôo 。-ûn

這是我頭一擺去公視錄影，是緊張koh歡喜，因為這全世界ê人攏看有neh!
攝影棚內底足大、足tsē攝影機!
喔~~原來攝影棚生做按呢!阮感覺真神奇m̄-koh 甲我所想ê差kài-tsē。

開始錄影是真好sńg，逐關攏有無仝ê物件ài試驗，
阮有贏m̄-koh tī最後ê羅馬字彼關輸去--ah，無提tio̍h獎金，
m̄-koh我真享受這種難得ê過程kah經驗，像tia̍k算盤逐个ài kā金額pun-phenn除4份，
去頭前提物件，koh做伙看影片回答問題，這攏hōo我學tio̍h團隊合作ê精神。

真感謝老師hōo我機會tshuā阮去參加公視電視台ê錄影。

侯。宏 Hâu 。-hông

老師hōo我機會去參加公共電視ê錄影，
有寡台語我原本袂曉--ê，去到遐若會攏變會曉--ah。
我發覺台北kah高雄ê腔口無啥仝，雖然大部份攏聽有，
m̄-koh有時仔主持人in leh講啥我真正攏聽無。
In-ê腔口我攏sa無，因為仝款ê物件講兩擺攏講無仝款ê音實在聽kah霧煞煞！
玻璃杯仔？玻璃襪仔？「hî-kng」？
尾仔khah知影in leh講ê是魚櫥仔，「魚缸」！
這擺去錄影嘛會當講是去旅行tshit-thô，mā hōo我學tio̍h以前攏m̄-bat有ê經驗，
我感覺阮ê團隊合作足好--ê m̄-nā有實力運氣好，希望後擺koh有機會去。